#السـيـره_الهلاليــه.. الحلقة الخامسة
بعد ما صبوا مع الخفاجي وحاربوا معاه اليهود.. توكل بو زيد ورفاقته وكملو طريقهم..
وكانت شيحه موصيتهم انهم ما يخلوش يحيى يتقز..
مشو نصيب وبعدها نزلوا يتريحو.. حطو خبزتهم ف النار واتكو..
بهت يحيى لقيهم مرقدين رمى التاقزه..
قال لهم :
نوضو يا رفاقه لا فرق الله بينكم .. رحتو علي سوق البلا والتلايف
ما فيكم ميت بالحديد الا نا .. من عبيد ما يدعو بالوصايف
ومرعي تقتله حيه في ذيل بيرها .. منها يا نجاة كل خايف
ويونس تمسكه حضريه في راس قصرها .. عالي الرواويش هايف
وخالي ينعور وينزور .. ويجي يخرف النجوع الضفايف
واللي يطلع الخبزة يموت..
عدوا وسيبوا خبزتهم..
مشو اشوي قال لهم بوزيد العار اطول م العمر نسيبو خبزتنا ؟!
رد عليها لقى ذيب يطلع فيها.. اضربه اقتله وجاب الخبزة.. ( ذكرتها حسب الرواية فقط.. وكذب المنجمون ولو صدقوا )
هم بوزيد وجعاته في بنيخيه لأن هو اللي طلبهم يمشوا معاه..
فقال لهم :
دهمتكم للموت من غير رغبتي .. ولكن نبيكم شهد فوق الشفايف
نبيكم حكاوي الناس بالخير والثنا .. عليكم تقول اجيال قول الطرايف
واللي يريد المجد والصيت غايته .. يمشي طريق المريبين الحتايف
خالكم يبي لكم عمر من بعد عمركم .. تعيشو سهاري اجواد بين الولايف
دهمتكم للموت ياكبد غاليه .. نبي صيتكم يجتاز كل الطوايف
غوالي علي كيف عيني ودمعها .. بلاكم يشين العمر والقلب صايف
ونبي الغاليه(شيحة) تزغرت عليكم صادقه .. ضناها فراسين والغير شايف
علي كل حال.. كملوا طريقهم ووصلو لتونس وقعدو يتنقلو كل مرة في مكان..
وكان يونس عنده جاريه ايام وهو في نجد.. لكن رايحه منه.
يقال انه يوما ما لقوها وحدين ع الشط خذوها وعدو بيها لتونس.. عروضها للبيع
وكان فيه وليه ينقال لها السفيره عزيزه ( او اصفيره عزيزه ) كانوا هلها هل حكم.. لكن كلهم موتوا.. وعندها قصر وخدم.. وعندها كلمة ف الحكم..
كلمت السفيره عزيزة النخاس وطلبت منه جارية قاصة تجيد نظم الشعر..
مشى يدور لقي جارية يونس.. ضربها بالسوط
قالت له :
انت لا ينشكى منك ولا ينشكى لك .. ولانك صقر علي ليد طايب
وما عمر خطار العشا جو لبيتك .. ولا في الميعاد قالوا غايب
ضربتني نين حرقت كبدي .. اجعنك لاقيها وقت هد الترايب
قال هذي هي اللي تريدها السفيره عزيزة..
شراها وجابها للسفيره عزيزة..
قلنا في في بدايه اللي فاتت انه يحيى تقز وقال لهم :
نوضو يا رفاقه لا فرق الله بينكم .. رحتو علي سوق البلا والتلايف ... إلخ
هنا بوزيد تأثر.. لأن التاقزه قالت بنيخيه يموتو هم الثلاث وهو يروح يخرف علي ما صار لهم.. ( وكذب المنجمون ولو صدقوا )
المهم السفيره عزيزه.. قلنا شرت جاريه.. والجاريه هذي في الأصل كانت جارية يونس في نجد..
المهم.. اصفيره عزيزه استقبلت الجاريه وأكرمتها وقالت لها مانيش جايبتك تخدميني .، عندي خدم!
نريدك تخرفي لي وتحكي لي ( والجارية قلنا كانت قاصة وشاعرة )
تمت الجاريه تسهري فيها.. وتحكي لها في حكاوي سماح.. وحيل حكيها علي سيدها يونس..
دارت سيدها يونس ولد شيحه مضرب المثل.. ومن كثر الكلام والقصص اللي سمعتهن الصفيره عزيزه علي يونس تمنت انها تشوفه..
وبوزيد ورفاقته لما يريدوا حاجه من السوق يدزوا يونس.. ينفذوا في وصاة شيحة
(وعليكم بيونس كان خص زادكم .. راه يونس من سوق الشحاح يجيب)
يوم م الايام يونس ماشي للسوق شافاته الجاريه وخبرت الصفيره عزيزه..
الصفيره عزيزة قالت : ايش اللي يجيبه ؟؟
قالت لها الجاريه : حاجة الخيل السمحه..
عطتها فردة ركاب ذهب..
عدت للسوق وغطت راسها واهلبت من قدام يونس.. قال لها بيش الركاب سمت له سوم رخيص قال لها وين فردته الاخرى ؟
قالت له في البيت عند اسيادي..
عدا وراها.. نين وصل للسفيره عزيزة وقعد عندها في القصر معدش عاود
وهكي فقد بوزيد اول وأهم رفاقته الثلاث..
بعد ما حصل يونس في قصر اصفيره عزيزه..
قعد بوزيد هو ويحيى ومرعي..
ويقولوا لما يمشي يحيى بالزوايل يروحن اشباع.. ولما يمشي بيهن مرعي يجن جواعه
بوزيد استغرب!
قال خليني نشوف يحيى كيف يدير..
الحقه ثاني يوم.. وكان يحيى لما يمشي يجوه عبيد السواني يلعب فيهم بيش يلهو ويرتعن الزوايل.. وكلا مرعي يقعد يتعارك هو واياهم مايرتعنش..
المهم وين ما اقرب بوزيد من يحيى..
يحيى وقف اللعبة اللي دايرها لهم.. تعاركوا ! ضرب واحد منهم.. التموا عليه العبيد قتلوه..
جاهم بوزيد.. اللي اقتله اقتله.. واللي اضربه... واللي هرب..
عدو العبيد كلموا العسكر.. جا قايد العسكر اللي هو العلام ( وكان وزير الزناتي خليفه )
بهت العلام القيهم ناس اغرب وفيهم واحد ميت.. وقاتلين مجموعة من العبيد..
قال لهم هي معاي..
قال له بوزيد :
اصبر علينا نين ندفنوا رفيقنا .. فوت الرفاقه ف المحاضر يعيب
دفنو يحيى ( وفقد بوزيد الرفيق الثاني )
وخذاهم العلام شالهم حبسهم.. يقال ان يونس علم بيهم.. وسيب الوكال.. معش با ياكل
ت
دخلت السفيره عزيزه بحكم انها عندها جزو في الحكم.. وحاولت تطلقهم.. قالوا لها مسموح لك تطلقي واحد منهم بس..
قعد بوزيد يريد يطلع مرعي.. ومرعي يريد يطلع بوزيد.. ماتفاهموش!!
قال لهم الزناتي خليفه المدينة محصنة بسور.. وما عندهم وين يمشو اطلقوهم فيها..
اطلقوهم فيها..
قال مرعي ياخالي بيعني.. قال لا انت هو اللي بيعني نا عبد..
هنا يختلفو الرواة.. واحد يقول سبب البيعه بيش يدورو يونس..
وواحد يقول مستحقين.. علي اساس ياخذو حق البيعه وبعدها بوزيد يفك روحه.. ويبيعه بناخيه من جديد وهكذا..
وواحد يقول يبو يهربو، وكان هربو ما يطولهم حد الا العلام علي فرسه.. فهم يريدو يديرو مكيده لفرس العلام بيش معش تلحقهم..
علي كل حال مشى بيه للسوق.. وتما يقول :
ياشاري العبد الاطرم .. اللي ملاحا اطباعه
ان ناظن الخيل دير .. وان جاع مولاه باعه
جا صاحب سانيه قال له تعرف تخدم السواني قال له نعرف.. شراه
تما بوزيد يفسد في الزراعة ويقص ويعزق ويقول :
لو كان بوزيد عمار .. عمَّر سواني بلاده
من حاش بوزيد دمار .. نخلي السواني حماده
خذاه صاحب السانيه وشاله باعه.. او اطلقه ورد علي ابناخيه باعه من جديد.. حسب اختلاف الرواة المذكور سابقا..
المهم شراه راعي بقر قال له تعرف ترعى ؟؟
قال له نعرف..
بعد ايام.. لما روح البقر وجو يبو يخششوه.. قال بوزيد : ياسيدي انت تعبان وواصل حدك.. عدي تريح ماعليك فيهن
قال له باهي خشش البقر راس راس.. قال له بوزيد ماشي..
عدا الرجل روح..
وركب عمك بوزيد في البقر بالسيف.. يمسك البقره يذب راسها ويعزقه جوا.. وهلم جرا..
فخشش البقر راس راس
بقلم/ للبادية تاريخ
للحديث بقية ألتقيكم غدا إن شاء الله في حلقة ممتعه جدا انتظرونا وعدم النسخ مراعاه للمجهود
اترك لنا تعليقا ان كنت متابع