قصيدة السيارة

قصيدة السيارة
لشاعر_مطروح_ارحومه_أمغيب__بوداد_الصنقري رحمه الله وشاعر_ليبي
هو - عبد الرحمن امغيب بوداد (ارحومة) عليه رحمه الله،من عائلة بوداد،قبيلة الصناقرة
أولاد علي الأبيض،ويقطن شاعرنا ف نجع الصناقره بمدينه الحمام في محافظة مطروح
وشاعر مجيد قال الشعر في شتى الفروع،وقد مكث الشاعر رحومه بومغيّب فترة من الزمن في
ليبيا وتحديداً في بلدة (اشنيشن) قرب منطقة الفائدية بالجبل الأخضر، وله مساجلة
شعرية بينه وبين شاعر من ليبيا
هى مساجلة بين شاعرنا وشاعر من ليبيا، وقصة هذه القصيدة أنه كان هناك شخص
من أولاد علي قد أخذ سيارة من شخص ليبي، فدمرها في حادث سير وهرب، فأخذ صاحب السيارة يبحث عنه ولم يجده، فقال الشاعر الليبى:
---------------------------------------------------
كروة عطيبة كروة السيارة .. من صاد شين [1] ماجتني ولاخباره
لا عاد عرفته قاعد .. لاعاد عرفته ذب شور امساعد
ولا با يخلصني ولا يتباعد .. ولا با يموت وينقطع جرجاره
إن كان نا راعيته .. نبقى عطيب إن كان ما طنيته
وحالف ايمين انشرفه ع الميته .. ويبقى نهار اسود علي منقاره
لوكان غير انشوفه .. حالف ايمين انطير بين اكتوفه
الكبد دارهة بالحيل من مصروفه .. وطبه اللي ماعمر مسلم داره
واكل العبردي [2] في بعض تفتوفه .. وواكل افلوس الحاج بو دواره
هذا ماقاله الشاعر الليبي، وقد ألقى هذه القصيدة في حفل زواج ببلدة (شنيشن)، وكان الحضور 15شخصاً، فقال شاعرنا بعدما أحضر له أحد الأشخاص الشريط،
وكان وقتها في تلك البلدة التي كان بها العرس:
-----------------------------------------------------------
كيف دوتك ياصاحب السيارة .. اخبرك زاد ع اللازم وفيه مراره
كيف دوتك والسيرة .. احكيلي ولا تجحد ولا تخبيره
صاد شين ما ظني العيب ايديره .. مغير أنت لزماتك لهم خباره
صوبك لهم لزماتك .. لسانك طويل ورافعين لهاتك
سمعت العبردي في بعض كلماتك .. وسمعتك طريت افلوس بو دواره
وقالوا اتريد اطنه .. ملا طريحه غير خايف منه
صاد شين ما واجد اللي جابنه .. اصحى اتحصل فيها كان درت اشكاره
خليه عنك هايا .. الدم يفجعك وانت خفيف روايا
اطنه طريحه كيف يا هفايا .. ان كان هو عليّي من تريس عصاره
ان كان من تريس بوادي .. هل محافظة مطروح ناس سعادي
م الدار طالع للشلش من غادي .. اسع هبشتك تقصر علي منقاره
وان كان هو ملمد شوفه .. يقنى سوالف هالبات اكتوفه
ويدير م السلب كمشه علي شرشوفه .. تقدر ادمر من مثيله حاره
وذيب الخلا عصران عنده نوفه .. انظري فيك ماتقدر اتكح اصداره
كيف دوتك ياصاحب السيارة .. خبرك زاد ع اللازم وفيه مراره
راك عبت ف اول بادي .. طحت ف امهن مرحب وصبحك نادي
هاضا فطور الصبح شيله غادي .. وان كان زدت يبقالك غدا الكباره
ان زدت انزيدك .. وعارف بخورك م الطريق انحيدك
حذاي قابه دور بعيد نديدك .. ان كان تنهدى حود ع الشعاره
وحياة بوك لو نبقى صحيح انريدك .. تعاّود حلاوة ها الريق مراره
طعمته اتغير .. ونقلب الموجه والحديث اندير
ويحصل خبر واجد العقل يحيّر .. اتحوس ف البطم ما عاد اتجيب ادباره
سبحان من خلا البوم ايديّر .. والصقر في قفص دايل عليه جضاره
نا ما كنت عيب انريده .. حتى لوخطى ردي عليه نقيده
وايش جاب لبوادي لعيت احميده .. سمعت لهجته رطبه لها نجراره
طاح ف الشرك شوري تكاصى بيده .. بو مستكه بومشط بو نظاره
ياعطيب النقه .. دعايك انسى وضوه وحالك رقه
اللي ناصرك كله خلص في حقه .. وانت نصيبك دندشه بشطاره
صوبك دعي والدين عندك لقه .. وايش زارك ع العيب تنزل داره
ياصاحب القرباجه .. صاد شين مو كيفك ولا في حاجه
انت وين واحنا وين يا وجاجه .. خلك علي دوبك بعيد توارى
تموت وانت في بيتك اتقول دجاجه .. ماجبت م الاجواد حتى ماره
ياصاحب البرويطه .. يلي عليها درت حس وزيطه
مامن كروزر دمرتا حيطه .. ولا مسكوها مسك بالطياره
شديد عزم مو كيفك اكثر تخبيطه .. جاب غيرها وواصل بها مشواره
جاب غيرها وتملا .. شديد عزم لو كيفك ولا تمثله
ولا نريد نجبد فيك حيلي كله .. ولا خير في شاعر ايقول صغاره
يا صاحب الحكّيه .. ياعفن ناسك ياعطيب الجيه
هناك فرح في اشنيشن علي طاريه .. افرحت وين ما ضحكوا حذاك اصغاره
والله لو حضرتك ياخبيث النيه .. كل خمسطاش نحطكم ف شكاره
ياصاحب المكسوره .. ياوجه بافه شابطه ف اصقوره
مغير انت لاكروزر ولا فيتوره .. قالوا فليكس عطب م الماطاره
يجيبلي الله صدفه عوض بوقدوره [3] .. ونزروك زرت كلب في كساره
كيف دوتك يا صاحب السياره .. خبرك زاد ع اللازم وفيه مراره
--------------------------------------------------------------------------------
[1] صاد شين هوية ليبية كانت تمنح لأبناء مطروح، وص - ش نسبة للصحراء الشرقية.
[2] المرحوم العبردي المسماري من البيضاء.
[3] يقصد المرحوم عوض المالكي.
-----------------------------------------------------------------------
رحم__الله_الشاعر_ارحومه_مغيب.....

منقول مع بعض التصحيح ف معلومات العائله والعنوان
منقوووووووول